Հանրային հեռուստաընկերությանը տված հարցազրույցում ԱՔՀԿ նախագահ Արեգ Քոչինյանն անդրադարձել է հայ-ֆրանսիական հարաբերություններին, խոսել դրանք դե յուրե ռազմավարական մակարդակի վրա դնելու անհրաժեշտության մասին։
«Խաղաղության հաստատման և հայ-ադրբեջանական հարաբերությունների կարգավորման գործընթացում Ֆրանսիայի մեծագույն ներդրումը պետք է լինի Հայաստանի դիմադրունակության մակարդակի բաձրացմանն ուղղված ջանքերը»,-նշել է քաղաքագետը։
Այն, բացի ռազմատեխնիկական բաղադրիչից, իր մեջ ներառում է նաև ենթակառուցվածքների և էներգետիկ կարողությունների վերականգնումն ու Ռուսաստանից հնարավոր կախվածության նվազեցումը։ Ըստ քաղաքագետի՝ Հայաստանի առաջնային խնդիրն իր դիմադրունակության բարձրացումն է, երկրորդը՝ խաղաղության օրակարգի սպասարկումը և Ադրբեջանի կողմից հնարավոր պատերազմի լեգիտիմության նվազեցումը։ Չնայած նրան, որ խաղաղության պայմանագիրը չի երաշխավորելու երկու երկրների միջև խաղաղության հաստատումը, այնուամենայնիվ, այն ապաաէսկալացիայի հասնելու քայլ է։
