Հայ-ադրբեջանական բանակցություններում կողմերը համաձայնել են խաղաղության համաձայնագրի նախագծից հանել տարածաշրջանային հաղորդակցությունների ապաշրջափակման մասին հոդվածը: Որը սակայն Արեգ Քոչինյանի մեկնաբանմամբ չի նշանակում, որ այն դուրս է մղվում նաև երկկողմ բանակցությունների քննարկման համատեքստից: «Այն պահից սկսած, երբ որ դեմարկացիա-դելիմիտացիայի փաթեթը դուրս թողնվեց խաղաղության պայմանագրից, այն սկսեց քննարկվել փոխվարչապետերի ձևաչափով: Նույն տրամաբանությամբ կոմունիկացիաների հարցը դառնում է դրան զուգահեռ բանակցային գործընթաց», քանի որ դրանք նաև իրար հետ փոխկապակցված են: Ամենի արդյունքում ձևավորվում է երեք զուգահեռ բանակցային գործընթաց՝ «դեմարկացիա-դելիմիտացիա, կոմունիկացիաներ և բուն խաղաղության պայմանագիր» հարցերի շուրջ:
«Զանգեզուրի միջանցք»-ին առնչվող հարցին ԱՔՀԿ նախագահը արձանագրեց, որ այդ խոսույթն ու դրանից բխող վտանգներն առկա են, որի շուրջ ձևակերպումները սակայն տարեցտարի մեր հակառակորդներից հնչում է հսկայական տարբերությամբ: Անդրադառնալով «Զանգեզուրի միջանցք»-ի՝ Մեղրիով անցնող ճանապարհի և «Խաղաղության խաչմերուկ» նախագծի հարաբերակցությանը՝ Ա. Քոչինյանը նշում է, որ դրանք իրար չեն հակասում, «ավելին, Մեղրիով անցնող ճանապարհը «Խաղաղության խաչմերուկ»-ի բաղադրիչներից մեկն է. Դրանք փոխբացառող նախագծեր չեն, դրանք փոխլրացնող նախագծեր են»:
Իսկ հայ-ադրբեջանական սահմանազատման և չորս գյուղերին առնչվող խոսակցություններին հնչեց հետևյալ պատասխանը. «Հայաստանը չի զիջել չորս գյուղ Ադրբեջանին: Հայաստանի ԶՈՒ-ն դուրս է եկել իրենց վերահսկողության տակ գտնվող որոշ դիրքերից: Նրանք վերահսկողություն էին ապահովում մասնակի երկու և ամբողջական մեկ՝ նախկինում բնակեցված ադրբեջանական բնակավայրի վրա»:
