ԱՔՀԿ նախագահ Արեգ Քոչինյանը JAMnews-ին տված իր հարցազրույցում անդրադարձ է կատարել Բաքու Պուտինի այցի նպատակներին՝ նշելով, որ այն ավելի լայն համատեքստ ունի քան թվում է: «ՌԴ-ն վերադիրքավորում է մեր տարածաշրջանում և նոր ռազմավարական գործընկեր կամ դաշնակից ձեռք բերում։ Ռուսաստանը սկսում է բովանդակային առումով հեռանալ ՀՀ-ից և մտերմանալ Ադրբեջանի հետ»։ Պատճառը բազմաթիվ հարցերում Մոսկվայի և Բաքվի շահերի համընկնումն է, ինչպես օրինակ էներգետիկ ռեսուրսների վաճառքն ու վերավաճառքը Ադրբեջանի տարածքով և կարևոր հանգամանք ևս՝ երկու երկրների քաղաքական ռեժիմների նմանությունը։ «Երկուսն էլ այլևս կայացած բռնապետություններ են, անազատ պետությունների սանդղակների առաջատարներ են»: Սակայն քաղաքագետի պնդմամբ՝ ռուս-ադրբեջանական դաշինքը չի լինելու նույն խորությամբ, ինչ Հայաստանի պարագայում էր, քանզի Ադրբեջանը չունի այն կախվածությունները Ռուսաստանից, որոնք ուներ Հայաստանը նախկինում:
Հայ-ադրբեջանական հարաբերությունների կարգավորման կոնտեքստում փորձագետը նշում է, որ ՌԴ-ն փորձում է երկու կողմերին բերել Մոսկովյան հարթակ, որին Հայաստանի դիրքորոշումը բավականին հստակ է։ «ՀՀ-ն չի համաձայնի Մոսկվայում բանակցությունների գնալ, որովհետև նման բանակցությունների առնվազն մի փուլ մենք արդեն տեսել ենք, դրա կրկնության կարիք այլևս չկա»։ Ադրբեջանը այս հարցին բացասաբար է վերաբերվում, սակայն չի խոչընդոտում՝ քաջ իմանալով Հայաստանի դիրքորոշումը: Հարցազրույզի վերջում անդրադարձ է կատարվում նաև հայ-բելառուսական հարաբերությունների սրացմանը, որը ըստ Քոչինյանի՝ «կեղծ օրակարգ» է. «Խնդիրը ոչ թե Բելառուսի, այլ Ռուսաստանի հետ է, քանի որ անվտանգության ոլորտում մեր գործընկերը Մոսկվան էր»:
Ամբողջական նյութին կարող եք ծանոթանալ` անցնելով հղմամբ:
