Անվտանգային քաղաքականության հետազոտական կենտրոն
«Անվտանգային քաղաքականության հետազոտական կենտրոն» (ԱՔՀԿ) հասարակական կազմակերպությունը վերլուծական կենտրոն է, որն իրականացնում է խորացված փորձագիտական հետազոտություններ ու վերլուծություններ, տրամադրում քաղաքական, անվտանգային և հասարակական կյանքի տարբեր բնագավառներին առնչվող խորհրդատվություններ։
Կենտրոնը հիմնադրվել է 2022 թվականի հունվարին՝ պատմաբան և քաղաքագետ Արեգ Քոչինյանի կողմից։
ԱՔՀԿ-ն պարբերաբար կազմակերպում է տարաբնույթ միջոցառումներ, այդ թվում՝ հարցազրույցներ, մամլո ասուլիսներ, դասընթացներ, դասախոսություններ, փորձագիտական հանդիպումներ։ Կենտրոնն իրականացնում է նաև կրթական, հրապարակախոսական, վերլուծական, հետազոտական նախագծեր, հրապարակում, հրատարակում և տարածում է գիտական, վերլուծական, տեղեկատվական բնույթի նյութեր:
Կենտրոնի առաքելությունն է սերմանել և ջատագովել հասարակության ռացիոնալ մտածողության ձևավորումը։
Կենտրոնի նպատակն է ապահովել Հայաստանի, տարածաշրջանի և ավելի լայն աշխարհաքաղաքական գործընթացների շուրջ ծավալվող ռազմաքաղաքական հարցերի քննությունը, վերլուծությունը, սպառնալիքների գնահատումը և քաղաքական կանխատեսումները, հակագործողությունների մշակումը, դրանց վերջնարդյունքների կանխատեսումը և այդ ամենի հանրայնացումը՝ ապացույցների վրա հիմնված ամփոփումների և առաջարկների տեսքով։
Կենտրոնի կարգախոսն է՝ «Ժողովրդավարություն, կայուն զարգացում, անվտանգություն»
ԱՔՀԿ-ն առաջնորդվում է ժողովրդավարական արժեքներով, իրավահավասարության և մարդու իրավունքների ջատագովությամբ։ Դեմ է պատերազմներին, մարդկության կամ բնության դեմ հանցագործություններին, բիրտ ուժի կիրառմանը։
Կենտրոնի առանցքային ծրագրերն ու նախաձեռնությունները՝
- Տարածաշրջանային խաղաղաշինության գործընթացներ
ԱՔՀԿ-ի անդամներն ու փորձագետներն ակտիվորեն ներգրավված են նաև տարածաշրջանային խաղաղաշինությանն ուղղված նախաձեռնություններում, այդ թվում՝ հայ-թուրքական, հայ-ադրբեջանական փորձագիտական երկխոսություններում։
- «Դիլեմա» հեռուստահաղորդումը
2023 թվականից կենտրոնը ներկայացնում է «Դիլեմա» հաղորդաշարը, որը հեռարձակվում է «Բուն TV»-ի եթերում։
- «Կառուցելով ավելի դիմադրունակ ժողովրդավարություն» ծրագիրը
Կենտրոնի այցեքարտային այս ծրագիրը նպատակ ունի զարգացնել ժողովրդավարական համակարգերի դիմադրունակությունը՝ խթանելով ինքնիշխան ընտրության հնարավորություններ։
- «Ժողովրդավարական անվտանգություն» առցանց պարբերականը
Այս նախաձեռնությունը ապահովում է վերլուծական հարթակ՝ ներգրավելով առաջատար փորձագետների և ներկայացնելով փաստահեն վերլուծություններ անվտանգային մարտահրավերների, աշխարհաքաղաքական զարգացումների և ժողովրդավարական գործընթացների վերաբերյալ։
Այս նախաձեռնությունների իրականացմամբ և շարունակաբար ընդլայնվող իր վերլուծական ու հանրային գործունեությամբ ԱՔՀԿ-ն ձևավորել է մեծ ազդեցություն և ձեռք է բերել դրական համբավ ոչ միայն Հայաստանի քաղաքացիական հասարակության շրջանում, այլ նաև միջազգային ասպարեզում:
